لغمان کې سلګونه بزګرانو ته د غنمو اصلاح شوی تخم او کیمیاوي سرې ووېشل شوې
۶ مرغومې ۱۴۰۳ه.ش
۲۴ جُمَادَى الثاني۱۴۴۶ه.ق
د لغمان ولایت کرنې، اوبو لګولو او مالدارۍ ریاست تر چتر لاندې، د افغانستان د راتلونکو نسلونو مؤسسې په تخنیکي همکارۍ او د خوراک او کرنې نړیوال سازمان په مالي ملاتړ، ۳۶۰ بزګرانو ته د غنمو اصلاح شوی تخم او کیمیاوي سرې ووېشل شوې.
د کرنې ریاست رئیس الحاج مولوي عبدالستار محمد په لارښوونه، د میکانیزې مدیر انجینر عین الله او د افغانستان د راتلونکو نسلونو مؤسسې مسؤلینو په ګډه یاده مرسته بزګرانو ته ورکړه. په دې مرسته کې هر بزګر ته ۵۰ کیلو ګرامه د غنمو اصلاح شوی تخم، ۵۰ کیلو ګرامه سپینه سره او ۵۰ کیلو ګرامه توره سره شامل و.
په دغه پروسه کې، د کرنې ریاست او مؤسسې مسؤلینو بزګرانو ته سپارښتنه وکړه، چې د دې تخمونو کرکېله په عصري او کتاري ډول ترسره کړي، ترڅو په راتلونکي کې غوره حاصلات ترلاسه کړي.
بزګرانو د یادو مرستو په ترلاسه کولو خوښي څرګنده کړه او له کرنې ریاست څخه یې د دې ډول مرستو د دوام غوښتنه وکړه.
د یادونې وړه ده، چې د دې پروسې موخه د بزګرانو اقتصادي وضعیت ښه کول او د کرنې په سکټور کې د پرمختللو میتودونو ترویج دی.
