بغلان کې د کرنیزو ځمکو اصلاح او زابرانو پاکولو چارې روانې دي
۴ مرغومې ۱۴۰۳ه.ش
۲۲ جُمَادَى الثاني۱۴۴۶ه.ق
د بغلان ولایت کرنې، اوبولګولو او مالدارۍ ریاست د کرنیزو ځمکو د اصلاح او زابرانو پاکولو په موخه لومړنۍ چارې په ډنډ غوري، مرکزي بغلان او دوشي ولسوالیو کې په ښه ډول روانې دي.
دغه چارې د کرنې رئیس الحاج مولوي رحیم الله "احدي" او د طبیعي زېرمو آمریت آمر محمد ابراهیم "عثماني" په لارښوونه، د اوبولګولو د نویو تخنیکونو د ترویج مدیر فیروز احمد "سهرابي" او د ډیزاین او برآورد مدیر انجینیر عبدالبشیر "بشارت" لخوا تنظیم او پر مخ وړل کېږي.
د زابرانو پاکولو موخه د کرنیزو ځمکو خوندیتوب، د اضافي اوبو لرې کول، د خاورې د تخریب مخنیوی، د کرنیزو محصولاتو د ودې ښه کول، د کرنیزو ځمکو د حاصلخېزۍ کچې لوړول، د ودانیو ساتنه، د صحي چاپېریال رامنځته کول، او د طبیعي زېرمو ساتنه ده.
یادې چارې د بغلان د کرنې ریاست د طبیعي زېرمو آمریت کارمندانو په هڅو ترسره کېږي، چې د دې ولایت کروندګر د کرنیزو اصلاحاتو او خوندیتوب لپاره له دې هڅو هرکلی کوي.
