هلمند کې د کرنیزو ځمکو د اصلاح لپاره د زابرانو پاکولو چارې روانې دي
۳ مرغومې ۱۴۰۳ه.ش
۲۱ جُمَادَى الثاني۱۴۴۶ه.ق
د هلمند ولایت د کرنې، اوبو لګولو او مالدارۍ ریاست څو ورځې وړاندې د کرنیزو ځمکو د اصلاح لپاره د شپږو زابرانو د پاکولو چارې پیل کړې، چې تر دې دمه یې چارې په ښه ډول روانې دي.
په دې پروژه کې د ۳۲ کیلومتره اوږدوالي لرونکي شپږ زابرانو پاکول شامل دي، چې په مرکز لښکرګاه، ناوې، او باباجي ولسوالیو کې موقعیت لري. تر دې دمه د سلیمان شازو د زابر لومړۍ برخه بشپړه شوې او د دویمې برخې کار روان دی.
د دې پروژې موخه د کرنیزو ځمکو ساتنه، د اضافي اوبو لرې کول، د کرنیزو محصولاتو د ودې ښه کول، د خاورې د تخریب مخنیوی، د ودانیو ساتنه، د صحي چاپېریال رامنځته کول او د طبیعي زېرمو ساتنه ده.
د یادونې وړ ده چې د دې چارې بشپړیدو سره به کرنیزې ځمکې لا حاصلخېزې شي او د کروندګرو لپاره به ښه فرصتونه برابر شي.
