هلمند کې زرګونو څارویو ته د چنجیو ضد درمل پلي کېږي
۲۹ لېندۍ ۱۴۰۳ه.ش
۱۷ جُمَادَى الثاني۱۴۴۶ه.ق
دهلمند ولایت د کرنې، اوبولګولو او مالدارۍ ریاست په هڅو، دافغانستان لپاره د هالینډ کمېټې په مالي همکارۍ دمرکز لښکرګاه په کډون په اتو ولسوالیو کې د ځایي مالدارانو څارویو ته د چنجیو ضد درملو د تطبیق چاري پیل شوې.
د هلمند ولایت د کرنې، اوبولګولو او مالدارۍ ریاست د مالدارۍ او حیواني روغتیا آمریت مسؤلینو د معلوماتو له مخې، دغه حیواني درمل د لښکرګاه ښار په ګډون د باباجي، ګرشک، سنګین، کجکي، خانشین، نادعلي، مارجې او نهرسراج ولسوالیو کې ۳۰ زره او ۹۰۰ وړو او لویو شخوند وهونکو څارویو ته تطبیقیږي، چې له مخې به یې په دغو څارویو کې د مړینې کچه راټیټه شي.
د یادو درملو د تطبیق موخه په لویو او وړو شخوند وهونکو څارویو کې د داخلي پرازیتونو، چینجیو له منځه وړلو، د محصولاتو زیاتوالي، د حیواناتو د مړینې د کچې کموالی او د مالدارانو د عاید لوړوالې په موخه ورکول کېږي.
باید وویل شي، چې په څارویو کې چینجي کولی شي د حیواناتو بدن کمزوری کړي، غذایي مواد وکاروي او ډول ډول ناروغۍ رامنځته کړي، د چینجیو ضد درمل د دې ستونزو مخه نیسي او د څارویو روغتیا ساتي.
