په امارتي ځمکو باندې د مخاربراتي انتنونو د تثبيت په موخه د همغږۍ دویمه تعقیبي غونډه دائره شوه 

د کرنې وزارت د اراضۍ لوی رياست په مقام کې د اراضۍ لوی رییس مولوي محمود مظلوم، د اراضۍ ادارې د ځمکو د اجارې او پانګه اچونې عمومي رییس ملا عبدالظاهر امين، د اترا ادارې مالي او اداري مرستيال مفتي نجم الدین ملاخېل، د اترا ادارې حقوقي سلاکار صبغت الله حامد، د اراضۍ ادارې حقوقي سلاکار فردوس ملک خېل، د ماليې وزارت د دولتي عوايدو آمر امرخېل او د اراضۍ لوی رياست يو شمېر مسؤلينو په شتون کې په امارتي ځمکو باندې د مخاربراتي انتنونو د تثبيت په موخه د همغږۍ دویمه غونډه دائره شوه.
دغه غونډه، چې مشري یې د اراضۍ لوی رییس مولوي محمود مظلوم کوله د اترا  ادارې ته دنده وسپارل شوه تر  څو د افغانستان اسلامي امارت د مشرتابه د حکم د پلي کولو په موخه دې د هېواد په کچه په امارتي او شخصي ځمکو باندې چې څومره مخابراتي انتنونه شتون لري د هغه مکمل لست دې د يو جدول په توګه د اراضۍ لوی رياست سره شريک کړي.
د اراضۍ لوی رییس وويل: «په پیل کې په مرکز او وروسته په ولاياتو کې د اراضۍ ادارې ماليې وزارت او همدارنګه د اترا ادارې څخه په ګډه يوه کميټه جوړه شي او دغه کميټه مسؤلیت لري چې د مخابراتي انتنونو د تثبيت په برخه کې خپل کار پیل کړي».
ښاغلي مظلوم زیاته کړه: «د افغانستان اسلامي امارت مشران هم د مخابراتي انتنونو د تثبيت په اړه تاکيد کړی، چې دا کار دې ژر تر ژره ترسره شي نو زما غوښتنه د اترا ادارې څخه دا ده، چې څومره ژر امکان لري د انتنونو لست دې د اراضۍ ادارې سره شريک کړي.»
ورپسې د اراضۍ ادارې د ځمکو د اجارې او پانګه اچونې عمومي رییس هم د يادې موضوع په تړاو داسې وویل: د ځمکو تثبيت چې آيا دا ځمکه شخصي ده او که امارتي دا کار د اراضۍ لوی رياست له دندو څخه دی که یو څوګ وايي چې دا زما شخصی ځمکه ده نو باید چې قانوني اسناد په لاس کې ولري که اسناد نلري نو باید چې د ياد کس موضوع محاکمو ته راجع شي چه هغوی يې په اړه پرېکړه وکړي.
د اترا ادارې مالي او اداري مرستيال مفتي نجم الدین ملاخېل د اراضۍ لوی رياست له مسؤلينو څخه وغوښتل، چې د ځمکو په تثبيت کې له پوره دقت څخه کار واخلي ترڅو هم د خلکو او هم د امارت حق تلف نشي.
په پای کې د اترا ادارې مسؤلينو د هر ډول همکارۍ تر څنګ د کار د لا چټکتيا په موخه خپل دوه تنه مسلکي کارمندان دغه کميټې ته ور وپېژندل چې د اراضۍ ادارې او مالیې وزارت له کارکوونکو سره يو ځاي خپل کار پیل کړي.
د عالیقدر امیرالمؤمنین (حفظه الله تعالی) د حکم په اساس کرنې وزارت ته دنده سپارل شوې ترڅو د ماليې وزارت او اترا ادارې سره په همغږۍ په امارتي ځمکو باندې د مخابراتي انتنونو ټولې نصب شوې پايې تثبيت وروسته دې د ټولو تثبيت شويو انتنونو په اړه اړوندو مخابراتي شرکتونو سره دې قراردادونه وشي.