د ننګرهار د کرنې رییس د بزګرانو ستونزو اورېدو په موخه حصارک ولسوالی ته سفر وکړ
۱۵ لړم ۱۴۰۳ه.ش
۳ جُمَادَى الأول ۱۴۴۶ه.ق
د ننګرهار د کرنې، اوبولګولو او مالدارۍ رییس مولوي محمد ولي محسن د بزګرانو د ستونزو د حل او د کرنې د پراختیا په موخه حصارک ولسوالی ته سفر وکړ.
هغه د حصارک ولسوالی له مرستیال او ترویج مدیرانو سره ناسته وکړه او د کرنې او مالدارۍ په برخه کې یې د ستونزو په اړه خبرې وکړې.
د حصارک ولسوالی مرستیال مولوي عبدالله عابد په دې ناسته کې د ځنګلونو د پرېکولو مخنیوی، جلغوزیو، چهارمغزو او نورو ځنګلی ونو کرلو، بڼوالۍ، اصلاح شويو تخمونو، مالدارۍ واکسینونو، حیواني خوراکي توکو او نورو اړونده برخو کې خپلې ستونزې او غوښتنې مطرح کړل.
د ننګرهار د کرنې رییس مولوي محمد ولي محسن د بزګرانو او مالدارانو د ستونزو د حل او پرمختګ لپاره د هر راز همکارۍ ډاډ ورکړ.
هغه وویل، چې سږ کال د حصارک په ولسوالی کې سلګونه بزګرانو ته د غنمو اصلاح شوي تخمونه او کیمیاوی سرې ووېشل شوې او په راتلونکي کې به هم دې ولسوالی ته جدي پاملرنه وکړي.
ښاغلي محسن همدارنګه د عشر او زکات مسؤلینو ته سپارښتنه وکړه، چې په خپلو کارونو کې روڼتیا او دیانت ولري او د ا.ا.ا کړنلارې مطابق عمل وکړي.
د ننګرهار د کرنې ریاست هر کال په زرګونه بزګرانو او مالدارانو ته د کرنې او مالدارۍ په برخه کې مرستې وړاندې کوي.
