خوست کې د ځنګلونو ساتنې او بیا رغونې لپاره د منګلو قومونو سره سلا مشورې ترسره شوې
۷ لړم ۱۴۰۳ه.ش
۲۵ رَبِیعُ الْثاني ۱۴۴۶ه.ق
د خوست ولایت د کرنې، اوبو لګولو او مالدارۍ رییس الحاج مولوي شېر محمد ذبیح په مشرۍ د ځنګلونو ساتنې او بیا رغونې کمیټې د ځنګلونو ساتنې لپاره د قومي شوراګانو جوړولو په موخه د قلندر او موسی خېلو ولسوالیو قومي مشرانو سره سلا مشورې ترسره کړې. په دې کمیټه کې د خوست ولایت قوماندانۍ امنیت آمر، علماؤ شورا، او د خوست پلي لیوا استازي شامل وو.
یادې کمیټې د ولسوالیو محترمو ولسوالانو، امنیه قوماندانانو، استخباراتو مسؤلینو او سیمهییزو قومي مشرانو سره په ګډه د ځنګلونو ساتنې او بیا رغونې په موخه د قومي شوراګانو د جوړولو لپاره سلا مشورې وکړې. همداراز، ټاکل شوې ده چې یاده کمیټه به په راتلونکي کې د ځنګل لرونکو ولسوالیو قومي شوراګانو څخه راپورونه راټول او د کرنې، اوبو لګولو او مالدارۍ وزارت سره یې شریک کړي.
دا اقدام وروسته له هغې ترسره شو چې تېره اوونۍ د کرنې، اوبو لګولو او مالدارۍ وزیر مولوي عطاءالله عمري خوست ولایت ته په سفر کې د ولایت مقام څخه د ځنګلونو ساتنې لپاره د قومي شوراګانو د جوړولو په برخه کې د همکارۍ غوښتنه وکړه او د قومي مشرانو سره یې اړینې مشورې شریکې کړې. قومي مشرانو یاد پلاوي ته ډاډ ورکړ، چې د منګلو قومونه چمتو دي د ملي شتمنیو ساتنه وکړي، که څه هم یادې ولسوالۍ د مرکز څخه په لرې او غرنیزو سیمو کې پرتې دي او ګڼې ستونزې لري. قومي مشرانو له کمیټې څخه د بدیل معیشت پروژو غوښتنه هم وکړه ترڅو د سیمې اوسېدونکو ته د اقتصادي ملاتړ لاره هواره شي.
