فراه کې لسګونو مالدارانو سره مرسته وشوه
د فراه د کرنې، اوبولګولو او مالدارۍ ریاست په همغږۍ او د «ډي، اې، آی» مؤسسې په تخنیکي همکارۍ، د فراه ولایت په مرکز کې ۴۵ بېوزلو مالدارو کورنیو ته یوه ورځنۍ روزنه، حیواني خوراکه (کنجاړه) او مالدارۍ اړوند توکي و وېشل شول.
د دې پروګرام په ترڅ کې، هرې کورنۍ ته ۸۰ کیلو ګرامه کنجاره، د مالدارۍ اړوند وسایل او روزنه ورکول شوې ده. د دې مرستې موخه د بېوزله او کونډو مېرمنو اقتصادي وده او د کور دننه د کار زمینه برابرول دي.
دا پروګرام د فراه ولایت د کرنې ریاست او «ډي، اې، آی» مؤسسې ترمنځ د همکارۍ په اساس ترسره شو، چې موخه یې د اقتصادي ستونزو د حل په برخه کې د مالدارو کورنیو ملاتړ کول او د هغوی د تولیدي وړتیاوو لوړول دي.
