خوست کې د «ګنجینه افغانستان» په نوم ملي نندارتون جوړ شو
په خوست ولایت کې د صنعت او سوداګرۍ ریاست له لوري جوړ شوی نندارتون د روان ۱۴۰۳ کال تلې میاشتې له ۲۴مې نېټې پیل شو او د تلې میاشتې تر ۲۶مې نېټې به دوام وکړي. یاد نندارتون چې د خوست ولایت په ملي لوبغالي کې جوړ شوی، پکې قیمتي، علمي، فرهنګي، تاریخي او په عمومي توګه د خوست ولایت داخلي فابریکو تولیدات نندارې ته وړاندې شول. د خوست ولایت د کرنې، اوبو لګولو او مالدارۍ ریاست د کرنیزو چارو آمر ښاغلي مولوي اسلام خان "منیب"، د پلان او برنامو عمومي مدیر اجمل "قاسمي" او د خصوصي سکتور مدیر افسرخان "صدیقي" هم په دې نندارتون کې ګډون کړی و. ښاغلي منیب د دې نندارتون جوړول یو مثبت ګام وباله او د نورو ورته نندارتونونو د جوړېدو هیله یې څرګنده کړه.
