د ننګرهار دکرنې ریاست: پانګوالو د پروسس فابریکوجوړولو لپاره د ځمکو غوښتنه وکړه
٢۴ تله ۱۴۰۳ه.ش
۱۲ رَبِیعُ الْثاني ۱۴۴۶ه.ق
د ننګرهار یو شمیر پانګوالو د کرنې رییس سره په ناسته کې د پروسس د فابریکو جوړولو په موخه د ځمکو غوښتنه وکړه.
د ننګرهار د کرنې او مالدارۍ د تولیداتو خوني رییس اجمل رحماني چې یو شمیر پانګوالو یي ملتیا کوله د ننګرهار د کرنې رییس سره خپلې ستونزې، غوښتنې او وړاندیزونه شریک کړل.
ښاغلي رحماني وویل په ننګرهار کې ډېری پانګوال غواړي د پروسس په برخه کې پانګونه وکړي خو د ځمکو کمښت له کبله نشي کولي چې خپل کارونه پیل کړي.
نوموړې ددې سربېره دبازار موندنې او نورو اړونده برخو کې هم د همکارۍ غوښتنه وکړه.
د ننګرهار د کرنې، اوبو لګولو او مالدارۍ رییس مولوي محمد ولي محسن راغلو پانګوالو ته په ټولو قانوني چارو کې د هر راز همکارۍ او همغږۍ ډاډ ورکړ.
