د کندهار ٨ ولسوالیو کې پر دوه زره بڼوالو د حاصل ټولولو اړین توکي ووېشل شول
١٩ تله ۱۴۰۳ه.ش
٧ رَبِیعُ الْثاني ۱۴۴۶ه.ق
د کندهار دکرنې، اوبولګولو او مالدارۍ ریاست د ملګرو ملتونو پراختیایي ادارې (یو،ان،ډي،پي) په مالي او د سولې بنسټ مؤسسې په تخنیکي همکارۍ ددې ولایت په اتو ولسواليو کې پر دوه زره بڼوالو د بڼوالۍ اړین توکي وېشلي دي.
دا مرسته د کرنې د مسؤولینو په حضور کې، د یوې رڼې پروسې له لارې ترسره شوه، چې موخه یې د بڼوالو ملاتړ، د کرنې سکتور پراختیا او په بڼونو کې د نوې کرنې ترویج دی.
په دې مرستو کې هر بڼوال ته د ۱۰۰ ډالرو په ارزښت یو کیټ ورکول شوی دی، چې یوه المونیمي زینه، د حاصلاتو راټولولو لپاره یوه بسته او ۵ پلاستیکي جالۍ پکې شامل دي. د دې توکو په کارولو سره به بڼوال په اسانۍ او خوندي ډول خپل حاصلات راټول کړي.
د کندهار کرنې ریاست مسؤلینو ټینګار کړی چې بڼوال دې یاد شوي وسایل په مناسبه توګه وکاروي او په بازار کې دې یې له پېرلو ډډه وکړي.
برخمن شوي بڼوال د کندهار کرنې ریاست او د سولې بنسټ مؤسسې څخه خوښ دي، چې په ورته برخه کې ورسره اړینې مرستې کېږي.
