په خوست کې د عشر او زکات د راټولولو پروسې د همغږۍ په موخه ناسته وشوه
د خوست ولایت والي مولوي عبدالقیوم روحاني او د کابل څخه راغلي د عشر او زکات د څارنې او نظارت پلاوي ترمنځ ناسته وشوه. دغه پلاوی د مولوي نصرالله مظهري په مشرۍ خوست ته سفر کړی و. په دې ناسته کې د خوست د کرنې ریاست سرپرست، مولوي اظهارالدین ابوناصر، او د عشر د راټولولو او راپور ورکولو امر هم برخه اخیستې وه.
د ناستې موخه د عشر او زکات د راټولولو پروسې منظمول او د هغې د همغږۍ په اړه خبرې کول وو. مولوي مظهري د خوست په ولایت کې د عشر او زکات د راټولولو د ترسره شويو فعالیتونو او لاسته راوړنو په اړه معلومات وړاندې کړل او له والي څخه یې د لا زیاتو همکاریو غوښتنه وکړه.
د خوست والي، مولوي عبدالقیوم روحاني، په دې برخه کې د هر اړخیزې همکارۍ ژمنه وکړه او د پروسې د بریالي پلي کېدو لپاره یې ملاتړ اعلان کړ.
