د اراضۍ لوی رياست کې د عالیقدر امیرالمؤمنین حفظه الله تعالی د حکم د پلي کولو په موخه غونډه دائره شوه
دکرنې، اوبولګولو او مالدارۍ وزارت د اراضۍ لوی رياست په مقام کې د اراضۍ لوی رییس مولوي محمود مظلوم، د کرنې وزارت د دفتر رییس ملا محمد حسين خورشید احمد، د اراضۍ لوی رياست د استملاک او بيا مېشتدنې عمومي رییس مولوي عبدالعلي عمري، د کرنې وزارت د بشري سرچينو پخوانی رییس مولوي عبدالولي اتقاني، د مالي او حسابي رییس مولوي ضیاالدین واقف، د یاد وزارت سلاکار بشير احمد پيام او د دغه وزارت يو شمېر کارکوونکو په شتون کې د عالیقدر امیرالمؤمنین حفظه الله تعالی د حکم د پلي کولو په موخه غونډه دائره شوه
په پيل کې د کرنې وزارت د اراضۍ لوی رییس مولوي محمود مظلوم راغلو مسؤلينو ته ښه راغلاست ووايه او له نوموړو سره د عالیقدر امیرالمؤمنین حفظه الله تعالی د (۲۸۱) ګنې ۱۹/۳/۱۴۴۶ نېټې حکم د پلي کولو په موخه يې خبرې وکړې او خپل نظرونه يې سره شريک کړل.
ورپسې د کرنې، اوبولګولو او مالدارۍ وزارت مسؤلينو په خپل وار د ياد حکم په اساس چې بايد په تخنيکي بستونو کې مسلکي کارکوونکي وګمارل شي او همدارنګه په اسنادونو کې د جعل او تزوير څخه د مخنيوي په پار خبرې وکړې او دا کار يې د هېواد د پرمختګ او سوکالۍ په برخه کې لوی ګام وباله.
په پای کې پرېکړه وشوه، چې په تخنيکي بستونو کې د مسلکي کارکوونکو د ګمارنې تر څنګ په دغو برخو کې يو شمېر کارکوونکو لپاره د مرکز او ولايتونو په کچه روزنيز پروګرامونه هم داير شي تر څو کومې سونزې چې په يو شمېر څانګو کې تر سترګو کيږي هغه ته هم د پای ټکی کېښودل شي.
