لوګر کې د کروندې ورځ د جوارو د نبات تر عنوان لاندې ونمانځل شوه
۱ تله ۱۴۰۳ه.ش
۱۹ رَبِیعُ الْأَوَّل ۱۴۴۶ه.ق
لوګر کې د کروندې ورځ د جوارو د نبات تر عنوان لاندې ونمانځل شوه. هغه مراسم، چې په همدې موخه د لوګر د کرنې، اوبولګولو او مالدارۍ ریاست په همکاري د خوړو او کرنې نړۍوالې ادارې په مالي ملاتړ د برادران لوګر خصوصي کرنیز شرکت کې پر لاره اچول شوي و، په کې د لوګر د کرنې او مالدارۍ ریاست مسؤولینو او یو شمېر بزګرانو ګډون کړی وو.
د لوګر ولایت د کرنې او مالدارۍ ریاست د کرنیزو چارو آمر محمد رفیع ابراهیمي له یادې راټولېدنې څخه موخه د بزګرانو ترمنځ د فکرونو تبادله، دوی ته اړینې سپارښتنې او د جوارو د نبات د ارزښت بیانول وبلل.
دغه راز بزګرانو د دې ورځي نمانځلو څخه خوښي څرګنده کړه او زیاته یې کړه، چې د داسې برنامو جوړول د بزګرانو د ستونزو د حل برخه کې خورا اغېزناک دي.
