لوګر کې د رومي بادنجانو حاصلات څه باندې ۶۴ زره ټنو ته رسېدلي
۱ تله ۱۴۰۳ه.ش
۱۹ رَبِیعُ الْأَوَّل ۱۴۴۶ه.ق
د لوګر دکرنې، اوبولګولو او مالدارۍ ریاست چارواکي وايي، چې سږکال په دې ولایت کې څه باندې ۶۴ زره تڼه د رومي بادنجانو حاصلات راټول شوي دي.
د لوګر ولایت د کرنې، اوبولګولو او مالدارۍ ریاست د عوایدو د تنظیم آمر قاري عبدالبصیر شاهد وایي؛ چې سږ کال د لوګر په کچه ټول ټال په ۱۶۴۴ هکټاره ځمکه کې رومي بانجان کرل شوي دي، چې له دغو کروندو څخه څه باندې ۶۴ زره او ۶۲۰متریک ټنه حاصلات لاسته راغلی دي.
نوموړي ښه اقلیمي شرایط، د رومي بانجانو د ناروغیو کنټرول، بزګرانو ته د عامه پوهاوي برنامو پر لاره اچول، د اوبو کنټرول او سپما په موخه د قطره یي سیسټم رامنځته کول د رومي بانجانو په حاصلاتو کې د ښه والي اساسي علتونه یاد کړل.
د لوګر دکرنې، اوبولګولو او مالدارۍ ریاست د مسؤولینو په وینا، د دې ولایت د اوسېدونکو د پرلپسې غوښتنو په اساس د اوبو د سپما په موخه سږکال په دې ولایت د رومي بانجانو د کښت په برخه کې یو لړ اړینې پریکړې شوې و، چې له دې سره د رومیانو په کښت کې یو اندازه کموالی هم راغلی دی.
د یادونې وړ ده، چې لوګر کې د رومي بانجانو کښت په خورا لوړه کچه کېږي، چې له دې ولایت څخه په کلنۍ ډول په زر ګونه متریک ټنه رومي بانجان ګاونډیو هېوادونو ته صادرېږي.
باید وویل شي، چې تېر کال لوګر کې یو من رومي بانجان له ٥٠ افغانیو څخه آن تر ٢٠٠ افغانیو بازار درلود، چې سږ کال بیا له ٣٠ افغانیو څخه تر ٨٠ افغانیو بازار لري.
د کرنې، اوبولګولو او مالدارۍ وزارت اړوندو بنسټونو سره په همغږۍ هلې ځلې کوي، چې د هېواد د بزګرانو کرنیزو محصولاتو ته په کوردننه او بهر بازارموندنه وکړي.
