د ننګرهار وادي کرنیز امارتي شرکت درېيم فارم کې رغنیزې پروژې پیل شوې
۲۷ وږی ۱۴۰۳ه.ش
۱۴ رَبِیعُ الْأَوَّل ۱۴۴۶ه.ق
د ننګرهار وادي کرنیز امارتي شرکت درېيم فارم کې د دوو سترو رغنیزو پروژو چارې، چې ۲۵ ميليونه افغانۍ لګښت پرې راځي، د ننګرهار والي حاجي ملا محمد نعيم اخند، د ننګرهار وادي کرنیز امارتي شرکت رییس سید محمد نعیم محمدي او یو شمېر نورو چارواکو په لاسونو د ډبرې په اېښودلو پیل شوې.
په دې پروژو کې د ۷ کیلومتره فرعي سړکونو جغل اچونه، د ۱۲۰۰ متره اوږدوالي د بولډر استنادي دېوال جوړول، او د ۴۵۰۰ متره مکعبه زابرونو پاکول شامل دي. د ننګرهار کانال وادي کرنیز شرکت رییس، محمد نعیم محمدي، د دې پروژو د پیل پر مهال وویل چې د تېرو لسیزو جګړو او اورښتونو له امله د کانال زیاتې برخې زیانمنې شوې وې. اوس د دوو کرنیزو شرکتونو (زهیر اسحاق او ساحل بهار کرنیز شرکت) په همکارۍ دا رغنیز فعالیتونه د راتلونکو سیلابونو او ګواښونو د دفع کولو په موخه د ترسره کېدو په حال کې دي.
په تېرو کلونو کې د اورښتونو او سېلابونو له امله د کانال ډېره ځمکه له ګواښ سره مخ شوې وه، چې د یادې ځمکې فصلونه او بڼونه یې سخت زیانمن کړي دي. د ننګرهار وادي کرنیز امارتي شرکت دغه پروژې په دوو میاشتو کې بشپړوي، څو په راتلونکي کې د کرنیزو ځمکو خوندیتوب تضمین کړي.
