کندهار ته دکرنې وزارت د ځنګلونو رییس سفر
۲۶ وږی ۱۴۰۳ه.ش
۱۳ رَبِیعُ الْأَوَّل ۱۴۴۶ه.ق
د کرنې، اوبولګولو او مالدارۍ وزارت د ځنګلونو رییس ملا سراج الحق «میرویس ذاکري» کندهار ولایت ته دخپل سفر په ترڅ کې په داسې حال کې، چې د کندهار د طبیعي سرچینو آمر او یوشمېر نورو سیمه ییزو چارواکو یې ملتیا کوله، د لوړ شاولیکوټ په ولسوالی کې د منګالي فارم روانې پروژې، د یاد فارم غصب شویو ځمکو او ځنګلونو څخه لیدنه او څارنه وکړه.
ددې لیدنې په ترڅ کې اړوندو چارواکو ته لازمې لارښوونې وکړې، ترڅو د طبیعي شتمنیو ساتنه او د ځنګلونو، څړځایونو او وحشي ژویو څخه وخت پر وخت څارنه وکړي او هیچاته ددې اجازه ورنکړي، چې طبيعي زېرمې زیانمنې کړي.
باید وویل شي، چې د کندهار دکرنې ریاست چارواکو او د لوړ شاولیکوټ ولسوالی امنیتي ځواکونو له خوا په دې ولسوالی کې د طبیعي سرچینو کلکه څارنه کېږي او چاته هم اجازه نه ورکول کېږي، چې طبیعي سرچینې زیانمنې او یا د وحشي ژویو ښکار وکړي.
