د کابل قره باغ کې لسګونو اړمنو کورنیو سره د شاتو مچۍ او اړونده توکو مرسته وشوه
۲۴ وږی ۱۴۰۳ه.ش
۱۱ رَبِیعُ الْأَوَّل ۱۴۴۶ه.ق
دکابل دکرنې، اوبولګولو او مالدارۍ ریاست وایي، چې ددې ولایت د قره باغ ولسوالی پر۴۰ تنو اړمنو کورنیو د شاتو مچۍ او د مچیو روزنې اړوند توکي وېشل شوي دي.
دغه توکي د افغان سوله جوړونکي بشري مؤسسې په همکارۍ ددې ولسوالی پر بې وزله کورنیو وېشل شوي دي.
د چارواکو په خبره له دې مرستې څخه برخمن شوي اړمنې کورنۍ څه موده وړاندې د سروې له مخې په نښه شوي وو، چې پکې ۴۰کورنۍ شامل دي او پر هرې کورنۍ د شاتو مچیو ترڅنګ د شاتو مچیو د روزنې اړوند توکي وېشل شوي دي.
دکابل دکرنې، اوبولګولو او مالدارۍ ریاست چارواکي وایي، چې له وېشل شویو توکو به کلکه څارنه کوی او له ګټه اخیستونکو یې وغوښتل، چې له وېشل شویو توکو سمه ګټه پورته کړي.
له وېشل شویو مرستو څخه موخه په دغه ولایت کې بې سرپرسته کورنیو ته د کور دننه د کار زمینه برابرول، د شاتو مچیو روزنې صنعت ته وده او پراختیا ورکول او د کورنیو خوړو خوندیتوب ته زمینه برابرول دي.
