لغمان کې پر لسګونو بڼوالو د مرستې وېش لړۍ پیل شوه
۵ وږی ۱۴۰۳ه.ش
۲۲ صَفَر المُظَفَّر ۱۴۴۶ه.ق
د لغمان دکرنې، اوبولګولو او مالدارۍ ریاست د ملګرو ملتونو د پراختیایي ادارې په مالي او د اکشن اېډ مؤسسې په تخنیکي همکارۍ ددې ولایت ۲۵۰ بڼوالو سره په بڼونو کې دکرکیلي په پار د سبو د اصلاح شویو تخمونو، کیمیاوي سرو او د خاورې اماده کولو اړوندو توکو وېش لړۍ پیل کړی دی.
د لغمان دکرنې، اوبولګولو او مالدارۍ رییس مولوی عبدالستار محمد وویل، چې ددې مرستې په لړ کې به د دې ولایت مزکز مهترلام او قرغیو ولسوالی پر ۲۵۰ بڼوالو یاد توکي ووېشل شي.
د یادې مرستې د وېش پرمهال د کرنې رییس مولوي عبدالستار محمد وویل: «هرمستحق ته ۳۰ ګرامه د رومي بانجانو تخم، لس ګرامه کرم، یوکیلو د توربانجانو تخم، لس کیلو توره او ۲۵ کیلو سپینه سره او په دې سربیره دخاورې اماده کولو لپاره بیلچه،کلنګ او کشه ورکول کېږي.»
په ورته مهال د لغمان دکرنې رییس د اکشن اېډ مؤسسې له ولایتي مسؤلینو مننه وکړه، چې د بڼوالۍ سکتور د پیاوړتیا په پار د بڼوالو لاس نیوی کوي. هغه د مؤسسې له مسؤلینو وغوښتل، چې دغه مرستې دلغمان ولسونو لپاره بسنه نه کوي او نورو ولسوالیو ته دې هم خپل فعالیتونه وغځوي د دې ترڅنګ دکرنې رییس مرسته اخیستونکو ته سپارښتنه وکړه چې نوموړي تخمونه په خپلو بڼونو کې د مؤسسې د مسؤلینو دلارښوونو سره سم وکري.
