د کندهار دامان کې پر لسګونو مالدارانو د مالدارۍ کڅوړې ووېشل شوې
دکندهار ولایت د کرنې، اوبولګولو او مالدارۍ ریاست، د ملګرو ملتونو دخوړو او کرنې ادارې په مالي او د «اکټېډ» موسسې په تخنیکي همکارۍ ددې ولایت د دامان ولسوالی پر ۲۹۱ مالدارانو د مالدارۍ کڅوړې وېشلي.
د کندهار دکرنې ریاست چارواکي وایي، چې یادو مالدارانو ته د څارویو حیواني خوراکي توکو او د حیواني ناروغیو مخنیوی په اړه روزنه هم ورکړل شوې ده چې په تعقیب یې یادو مالدارانو سره د اړینو توکیو مرسته هم ترسره شوه.
ددغو مرستو په لړ کې هر یوه تن ته د شېدو یو عدد سطل، د شېدو د ساتلو ډبه، د شېدو لوټه، د شېدو فلتر او د څارویو د تقویې لپاره منرالي خښتې ورکړل شوي دي.
د یادولو وړ ده چې د مستحقو کورنیو د سروې لړۍ د یو ګډ پلاوي لخوا مخکې ترسره شوې ده.
دکندهار کې د کرنې ریاست هڅه کوي ترڅو د بېلابېلو برنامو له لارې د بزګرو او مالدارو لاسنیوی وکړي ترڅو ددوی په کرنیز او مالدارۍ اقتصاد کې بهبود او نوښت رامنځته شي.
