ننګرهار کې نږدې ۲۰۰۰ بزګرانو ته د کانالونو پاک کارۍ کې د کار زمینه برابرېږي
۱۶ زمری ۱۴۰۳ه.ش
۲ صَفَر المُظَفَّر ۱۴۴۶ه.ق
د ننګرهار د کرنې، اوبولګولو او مالدارۍ رییس مولوي محمد ولي محسن د کلیو بیا ودانولو او خیریه بشري مؤسسو مسؤلینو سره د نوي کارونو پیلولو او بزګرانو ته د پروژو د ښه تطبیق په موخه خبرې اترې وکړې.
د یادو مؤسسو مسؤلینو د ننګرهار د کرنې، اوبولګولو او مالدارۍ رییس ته خپلو نوو پروژو په تړاو معلومات وړاندې کړل.
د کلیو او بیا ودانولو موسسې مسؤل حاج محمد صالحي وویل دوی د ننګرهار په ۵ ولسوالیو کوټ، بټي کوټ، اچین، نازیان او دره نور کې ۱۰۷۷ بزګرانو ته د سبو او غلو دانو اصلاح شوي تخمونه، کیمیاوي سرې او کرنیز وسایل وېشو.
نوموړي وویل ۱۵۰۰ هېوادوالو ته د کانالونو په پاک کارۍ کې د کار زمینه برابروي او ۳۹۰ بیوزله، کونډو او ناچاره کسانو ته بلا عوضه نغدې پیسو وېش هم لرو.
همدارنګه د خیریه بشري مؤسسې مسؤل انجینر هدایت الله ثنایي هم د خپلي پروژې په هکله معلومات وړاندې کړل.
ښاغلي ثنایي وویل دوی په لعلپوره، مهمندره، اچین او سپین غر ولسوالیو کې ۴۰۰ کسانو په وسیله د کانالونو پاک کارۍ، ۵۰۰ بزګرانو ته د غنمو اصلاح شوي تخمونو، کیمیاوي سرو وېش، ۱۰۰۰ بزګرانو ته په کرنه کې روزنه او ۳۲۰ کونډو او بیوزله کورنیو ته د نغدو پیسو د وېش پروګرامونه لرو.
د ننګرهار د کرنې، اوبو لګولو او مالدارۍ رییس مولوي محمد ولي محسن د داسې ګټورو پروژو د پلي کولو او تطبیق خوښي وښوده او په ټولو قانوني چارو کې د همکارۍ پوره ډاډ ورکړ.
