خوست او پکتیکا ولایتونو کې د «جيپياس» د اندازه کولو عملي چارې پیل شوې
۱۱ زمری ۱۴۰۳ه.ش
۲۶ مُحَرَّمُ الحَرام ۱۴۴۶ه.ق
د خوست او پکتیکا په ولایتونو کې د «جيپياس» د اندازه کولو عملي چارې د خوست والي مولوي عبدالقيوم روحاني، د کرنې رییس مولوي شېرمحمد ذبيح، د کرنې وزارت د ځمکو د لوی ریاست د جیوډیزي او ملي نښه کولو ریاست مسوولینو، انجنیرانو اود یو شمېر نورو څانګو د مسوولینو په شتون کې پیل شو.
د کرنې، اوبو لګولو او مالدارۍ وزارت د ځمکو لوی ریاست د د جیوډیزي او ملي نښه کولو ریاست د تېر کال د وړاندوینې او منظور شوي پلان له مخې، د یاد ریاست د انجنیرانو دوه ګروپونه ګمارل شوي، چې د هېواد په کچه جیوډیزیکي چارې ترپوښښ لاندې راولي، چې وروسته به د بېلابېلو سروې ګانو او نقشو چمتو کولو په پار به ترې ګټه واخیستل شي. یادې ډلې ته دنده ورکړل شوې چې په خوست او پکتیکا ولایتونو کې د «جيپياس» نقطې جوړې کړي.
باید وویل شي، چې دغه پروګرام د پکتیکا ولایت مرکز د ښرنې ښار او مټاخان ولسوالی کې بشپړ شوی دی، او ډېر ژر به د خوست او پکتیکا ولایتونو په نورو ولسوالیو کې هم پیل شي، ترڅو د دواړو ولایتونو مرکز او ټولې ولسوالۍ د جیوډیزیکي نقطو تر پوښښ لاندې راشي.
