د اراضۍ لوی رییس د څړځایونو د تثبیت او تنظیم کارکوونکوته؛ستاسې کړنې به د افغانستان په تاریخ کې په زرینو کرښو ولیکل شي
۱۸چنګاښ ۱۴۰۳ه.ش
۲ مُحَرَّمُ الحَرام ۱۴۴۶ه.ق
د اراضۍ لوی رییس مولوي محمود مظلوم د هغو ټیمونو څخه لیدنه وکړه، چې په فاریاب ولایت کې د څړځایو د تشخیص او سروې لپاره له مرکز کابل څخه ورغلي دي.
په دغه لیدنه کي د سرحداتو او قومونو چارو مرستیال مولوي محمد اسمعیل غزنوي، د کرنې وزارت د طبیعي سرچینو لوی رییس مولوي عبدالاحد خلیل، د فاریاب ولایت د کرنې رییس، د فاریاب ولایت د سرحداتو او قومونو چارو رییس او ځینو نورو مسؤلینو د اراضۍ لوی رییس ملتیا کوله.
د اراضۍ لوي رییس مولوي محمود مظلوم له ټولو مسلکي کارکوونکو څخه مننه وکړه، چې په پوره اخلاص د خپل هېواد د آبادۍ لپاره کار کوي. ښاغلی مظلوم وویل، چې د یادې سروې په بشبړولو سره به دا کړنه د افغانستان په تاریخ کي په زرینو کرښو باندې ولیکل شي.
د سرحداتو او قومونو چارو وزارت مرستیال هم له ټول ساحوې کارکوونکو څخه مننه وکړه او د پوره همکاریو ډاډ یې ورکړ هغه زیاته کړه هر ټیم ته به یو صحي ټیم هم د دوی په اختیار کي ورکړل شي تر څو د ساحوي او مسلکي کارکوونکو د روغتیا لپاره له یاد ټیم سره مل وي.
د طبیعي سرچینو لوی رییس مولوي عبدالاحد خلیل وویل د یادې سروې په بشپړولو سره به هغه څړځایونه چې اوس مهال له منځه تللي بیاځلې آباد او د ګټې اخیستنې لپاره آماده شي.
د کرنې وزارت په هېواد کې د څړځایونو د بیارغاونې او تنظیم لپاره ځانګړي پلانونه لري، چې په وچو او شاړو سیمو کې د بوټوکرل، د څړځایونو پېژندنه او د څړځایونو ساتنه په کې شامل دي، چې د دې کار د ترسره کولو لپاره د کرنې وزارت او د سرحدونو او قبایلو چارو وزارت د کارکوونکو یوه ډله ده د څړځایونو دتثبیت او تنظیم په موخه روزل شوي دي، چې یاده ډله د څړځآیونو د تثبیت او تنظیم په موخه د هېواد ولایتونو ته سفرونه کوي.
