د لغمان علینګار کې پر لسګونو کورنیو د نغدو پیسو وېش لړۍ پیل شوه
۵ چنګاښ ۱۴۰۳ه.ش
۱۸ ذیالحِجّة ۱۴۴۵ه.ق
د لغمان دکرنې، اوبولګولو او مالدارۍ ریاست د امریکا نړۍوالې پراختیایي ادارې په مالي او د ژغورنې نړۍوالې کمېټې په تخنیکي همکارۍ ددې ولایت د علینګار ولسوالی پر ۱۱۶ اړمنو کورنیو د کوچني کارو بارونو د جوړېدو او د کورني اقتصاد د پیاوړتیا په موخه د نغدي مرستې وېش لړۍ پیل کړی دی.
ددې مرستې وېش لړۍ د کرنې، اوبولګولو او مالدارۍ رییس مولوي عبدالستار محمد، دځمکوالۍ امرمولوي ګل رسول زبیر او دعشر او زکات د راټولولو امر قاري ذبیح الله هشام په شتون کې پیل شو.
د لغمان د کرنې رییس مولوي عبدالستار محمد دمرستې د وېش پر مهال وویل: «د ژغورنې نړۍوالې کمیټې په همکارۍ نوموړو اړمنو کورنیو ته د کورني اقتصاد د پیاوړتیا او وړو کاروبارونو د جوړیدو او تقوي په پار هرې کورنۍ ته 27600 افغانۍ ورکول کېږي، چې یادې کورنۍ به په دغو پیسو د ځان لپاره یو کاروبار جوړوي.»
د لغمان دکرنې رییس زیاته کړه، چې د یادې مؤسسې له لوري دغوکورنیو ته څه وخت وړاندې د کاروبار د جوړېدو په برخه کې عملي روزنه هم ورکړل شوې وه.
ددې مرستې موخه د بېوزله کورنیو ملاتړ او په ټوله کې هېوادوالو ته د کاري فرصتونو برابرول دي.
