شنې خونې اروزګان د سبو له پلوه ځان بسیا کوي
۳ چنګاښ ۱۴۰۳ه.ش
۱۶ ذیالحِجّة ۱۴۴۵ه.ق
د اروزګان دکرنې چارواکي وایي، په ټولو موسمونو کې سابه او ترکاریو ته د اروزګان د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې شنې خونې جوړې شوي دي.
د چارواکو په خبره د اروزګان ولایت له شنوخونو څخه ډول ډول سابه راټول او ددې ولایت په هټیو کې پلور ته وړاندې شوي دي.
د اروزګان دکرنې ریاست چارواکي وایي، چې دکرنې وزارت د پرمختیایي برنامو او پروژو له لارې په دې ولایت کې د لوړ ارزښت لرونکو کرنیزو محصولاتو او د سبو او ترکاریو د کرکېلي د نویو لارو چارو دودولو په پار ددې ولایت په کچه لوی او کوچني شنې خونې جوړې شوي دي، په یوه کال کې دوه فصله ورکوي، چې تر ډېره په کې بادرنګ او رومي بانجان کرل کېږي.
له تېرو څو ورځو راهیسې سابه (سبزۍ) لکه بادرنګ او رومیان چې د اروزګان ولایت په شنو خونو کې راټوکېدلي او په دې موسم کې یې حاصل د ښار په نږدې ټولو هټیو کې ليدل کېږي، چې په دغو شنوخونو کې لسګونه کسان په کار بوخت دي.
