پروان ولایت کې د کروندې ورځ ونمانځل شوه
![پروان ولایت کې د کروندې ورځ ونمانځل شوه](https://www.mail.gov.af/sites/default/files/2024-06/img-20240610-wa0101.jpg)
۲۱ غبرګولی ۱۴۰۳ه.ش
۳ ذیالحِجّة ۱۴۴۵ه.ق
د پروان ولایت د کرنې، اوبولګولو او مالدارۍ ریاست د کرنې وزارت د کرنې او مالدارۍ مرستیال مولوي صدراعظم عثماني په حضور کې د دغه ولایت په جبل السراج ولسوالۍ کې د کروندې ورځ ولمانځله.
د کرنې وزارت د کرنې او مالدارۍ مرستیال مولوي صدراعظم عثماني د کروندې د ورځې د نمانځلو په مراسمو کې وویل: «تېر کال مو څه باندې ۳۰ زره مټریک ټنه اصلاح شوي تخمونه وېشلي دي، خو سږکال زموږ موخه داده، چې ۶۰ زره ۴۴۰ ټنه اصلاح شوي تخمونه ووېشو چې د اصلاح شویو تخمونو د وېش په زیاتوالي سره کرنیز حاصلات هم زیاتېږي.»
مولوي صدراعظم عثماني، د روان کال په ترڅ کې د بزګرانو د ملاتړ په موخه د کرنې وزارت د پروګرامونو او پلانونو یادونه وکړه او په دې برخه کې یې د هېواد د ځان بسیا کېدو ډاډ ورکړ.
د پروان ولايت د کرنې رياست سرپرست مولوي نياز محمد تائب د کرنې او مالدارۍ پر اهميت ټينګار وکړ او ويې ويل: «د پروان ولايت خلک کروندګر او مالدار دي او دغه ولايت د بڼوالۍ، کرنې او مالدارۍ لپاره ډېر ښه اقليم لري، په همدې موخه ددې ولایت هر وکړی باید په دې برخه کې هلې ځلې وکړي.»
د جبل السراج ولسوال مولوي عبدالمعرؤف حقجو د کرنې وزارت د کرنې او مالدارۍ مرستیال ته د ښه راغلاست ترڅنګ وویل: « په ټول هېواد کې امنیت تامین شوی او په بېلابېلو برخو کې خلکو ته د خدمت لپاره زمینه برابره شوې ده. اسلامي امارت دې د بزګرانو د ملاتړ ترڅنګ دکرنې او کرنیزو محصولاتو ودې او پراختیا ته جدي پاملرنه وکړي.»
د پروان ولایت د جبل السراج ولسوالۍ مخکښ بزګر عبدالله وویل: «ددې ولایت بزګران د کرنې میکانیزه کولو په پار کرنیز اصلاح شویو تخمونو، کیمیاوي سرو او کرنیزو ماشینونو ته اړتیالري. اسلامي امارت باید دې برخې ته جدي پاملرنه وکړي.»
د دغه پروګرام په ترڅ کې دکرنې وزارت د کرنیزو څېړنو د انسټیټوت لوی رییس مولوي نصرت الله طلحه، د کرنیزو تخمونو د تصدیق ورکونې رییس مولوي صدیق الله رحماني، د اطلاعاتو او عامه پوهاوی رییس مولوي مصباح الدین مستعین، د دعوت او ارشاد رییس مولوي مفتاح الدین متقي، دکرنې او مالدارۍ مرستیال سلاکار مولوی ګل طالب جان ذکي او دغه راز د پروان دکرنې رییس مولوی نیاز محمد تائب،د جبل سراج ولسوال مولوي عبدالمعروف حقجو، د سالنګ ولسوالۍ ولسوال مولوي سمیع الله عمري، د سوداګرۍ او صنایعو رییس قاري راز محمد یاسر، د کاپیسا ولایت د کرنې رییس مولوي رحیم الله نعماني، د پروان ولایت د کرنې ریاست یو شمېر کارکوونکو او د پروان ولایت یوشمېر بزګرانو هم حضور درلود.