ننګرهار کې لبني محصولاتو ته د بازار موندنې په موخه د شېدو ټولولو مرکزونه جوړ شول
۱۴ غبرګولی ۱۴۰۳ه.ش
۲۶ ذوالقعده ۱۴۴۵ه.ق
د ننګرهار د کرنې، اوبولګولو او مالدارۍ ریاست په هڅو د افغانستان لپاره د هالینډ کمیټې په تخنیکي همکارۍ او د اروپایې ټولني په مالي ملاتړ ددې ولایت په درېیو ولسوالیو کې د شېدو ټولولو مرکزونه جوړ او ګټې اخیستنې ته وسپارل شول.
د ننګرهار د کرنې، اوبولګولو او مالدارۍ رییس مولوي محمد ولي محسن وویل، چې د شېدو ټولولو یاد مرکزونه د ۳۳۲ زره او ۶۴۰ افغانیو په لګښت د ننګرهار په سره رود، بهسود او دره نور ولسوالیو کې جوړ شوي دي.
ښاغلی محسن وویل، چې د یادو مرکزونو جوړولو موخه د مالدارۍ سکتور پیاوړتیا، حیواني محصولاتو ته بازار موندنه، کاري فرصتونو برابرولو او د خوړو خوندیتوب رامنځته کول دي.
دافغانستان لپاره د هالینډ کمېټه د شېدو راټولولو مرکزونو سربېره د مالدارۍ سکتور غښتلتیا لپاره په بېلابېلو برخو کې مرستې کوي.
