لوګر کې د غنمو کروندو او حاصلاتو کې زیاتوالی راغلی
۹ غبرګولی ۱۴۰۳ه.ش
۱۰ ذوالقعده ۱۴۴۵ه.ق
د لوګر د کرنې، اوبولګولو او مالدارۍ ریاست چارواکي وایي، چې سږ کال په دې ولایت کې پر ۲۴ زره او ۱۱ هکتاره ځمکه باندې اوبیز او للمي غنم کرل شوي دي.
د لوګر د کرنې او مالدارۍ رییس مولوی عبدالرؤف سعید وویل؛ چې روان ١٤٠٣کال، په دې ولایت کې ټول ټال پر۲۴ زره او ۱۱ هکتاره ځمکه غنم کرل شوي، چې ۱۰۱۱ هکتاره یې للمي غنم دي.
نوموړي زیاتوي، چې د لومړینو مالوماتو او وړاندوینو له مخې له کرل شویو ځمکو څخه به ۶۹ زره او ۱۳۲ متریک ټنه حاصلات ترلاسه شي.
دا په داسې حال کې ده، چې تېر ۱۴۰۲ لمریز کال کې هم په لوګر ولایت کې پر۲۲ زره او ۴۰۰ هکتاره ځمکه باندې غنم کرل شوي و، چې څه باندې ۶۶ زره او ۶۴۰ متریک ټنه غنم ورڅخه لاسته راغلي و.
د لوګر دکرنې ریاست ددې ولایت پر زرګونو بزګرانو د غنمو اصلاح شوي تخمونو او کیمیاوي سرو د وېش ترڅنګ له دوی سره نغدې مرستې او ترڅنګ یې د همکارو مؤسسو او په خپله دکرنې ریاست مسلکي کارکووکو په مرسته د کروندو د ناروغیو مخنیوی، تشخیص، درملنې او له کرکیلې تر حاصل ټولو پورې په ټولو برخو کې بزګرانو ته لازمې لارښوونې کړي دي.
