د ننګرهار دکرنې رییس تورخم بندر کې د قرنطین مدیریت د ستونزو حل په موخه له یو شمیر مسؤلینو سره ناسته وکړه
۵ غبرګولی ۱۴۰۳ه.ش
۱۶ ذوالقعده ۱۴۴۵ه.ق
دننګرهار د کرنې، اوبو لګولو او مالدارۍ رییس مولوي محمد ولي محسن تورخم ښارګوتي کې د قرنطین مدیریت کارکوونکو، کمیسارۍ مرستیال او د ګمرک مدیر او یو شمېر نورو مسوولینو سره ناسته وکړه.
په دې غونډه کې د ننګرهار د کرنې، اوبولګولو او مالدارۍ رییس مولوي محمد ولي محسن د قرنطین کارکوونکو ته په تورخم کې دخېلو اداراتو سره د ښې همغږۍ سپارښتنې وکړې او په کارونو کې پر روڼتیا او اصولو له مخي اجرآ کولو ټینګار وکړ.
ښاغلی محسن د سرټفکیټونو وېش، توکو فومګیشن، حیواني او د نباتي محصولاتو صادراتو او وارداتو ستونزې د ګمرک مسؤلینو سره شریکي کړې، چې دهغوی له لورې ورته د حل ډاډ ورکړل شو.
د ننګرهار دکرنې رییس په تورخم کې کارکوونکو ته امکاناتو ته په کتلو د لا زیاتو اسانتیاوو برابرولو ډاډ ورکړ.
