لغمان کې د څړځایونو بیارغونې په پار هڅې
۱۸ سلواغه ۱۴۰۲ه.ش
۲۶ رَجَب المُرَجَّب ۱۴۴۵ ه.ق
د لغمان دکرنې، اوبولګولو او مالدارۍ ریاست د ملګرو ملتونو دخوړو او کرنې ادارې په همکارۍ ددې ولایت د طبیعي سرچینو او څړځایونو د خوندیتوب او بیارغونې په پار هلې ځلې پیل کړي دي.
ددغو هلو ځلو په ترڅ کې د لغمان قرغه یې ولسوالی ګنداب کلي کې د یو حشر په ترڅ کې د توتانو ۵۰۰ نیالګي کښېنول شوي دي او ترڅنګ یې په یاده سیمه کې د غوړاسکو ۳۰ کیلوګرامه تخمونه او ۵۰۰ کیلو د وحشي رشقې تخمونه هم کرل شوي دي.
د لغمان دکرنې، اوبولګولو او مالدارۍ ریاست هلې ځلې کوي، چې د همکارو مؤسسو او ددې ولایت د خلکو په همکارۍ ددې ولایت طبیعي سرچیني خوندي او بیا رغولو ته یې زمینه برابره کړي.
