لغمان کې د بڼوالۍ د پراختیا په پار د بادامو قوریه جوړېږي
۱۲ سلواغه ۱۴۰۲ه.ش
۲۰ رَجَب المُرَجَّب ۱۴۴۵ ه.ق
د لغمان دکرنې، اوبولګولو او مالدارۍ ریاست د ملګرو ملتونو د خوړو او کرنې ادارې په همکارۍ ددې ولایت د مرکز مهترلام حکیم آباد کلي کې د بادامو څلور جریبه قوریه جوړوي.
د چارواکو په خبره په دې قوریه کې د بادامو ۷۳۶ کیلو ګرامه تخم کرل کېږي، چې له دغو تخمونو څخه به ۳۰۰ زره د بادامو نیالګي ترلاسه شي.
دغه راز د ملګرو ملتونو د خوړو او کرنې ادارې په همکارۍ د لغمان ولایت په اتو سیمو ( عليشنګ، مېل دره او ماسموت، کردي سالاب، مرکز مهترلام کرنج، حکيم اباد، ګلارام، قرغه يي اميبړ او الیاس خيلو) څړځايونو کې د وحشي رشقې پنځه زره کيلو ګرامه تخم هم د ټولنې پر مټ کرل شوي دي.
باید وویل شي، چې د لغمان دکرنې ریاست د ملګرو ملتونو د خوړو او کرنې ادارې په همکارۍ ددې ولایت د ځنګلونو او څړځایونو د بیارغونې په پار پنځه کلن فعالیتونه پلان کړي دي، چې په پلي کولو سره یې ددې ولایت ځنګلونه او څړځایونه رغول کېږي.
