سروبي کې د باراني اوبو د مدیریت پروژې چارې پیل شوې
۱۳ مرغومې ۱۴۰۲ه.ش
۲۱ جُمَادَى الثاني ۱۴۴۵ ه.ق
د کابل دکرنې، اوبولګولو او مالدارۍ ریاست وایي، چې ددې ولایت د سروبي ولسوالی په یخډنډ او ګازونو سیمو کې د افغانستان لپاره د ناروې کمیټې په همکارۍ د باراني اوبو د مدیریت په پار د چکډمونو پروژې چارې پیل شوي دي.
د کابل دکرنې ریاست چارواکي وایي، چې ددغو پروژو څخه د لیدنې په ترڅ کې اړوندو چارواکو ته د پروژو د لا ښه پلي کېدو په پار لازمې سپارښتنې او لارښوونې وشوې.
ددغو پروژو په ترڅ کې لسګونو کسانو ته دکار زمینه برابره شوې، چې موخه د باراني اوبو مدیریت او په ټوله کې د ځمکې لاندې اوبو د کچې زیاتول او مالدارانو او بزګران ته د دوی د اړتیا وړ اوبه برابرول دي.
