سوېل لویدځ زون کې د غنمو تخمونو د اصلاح کولو په پار هڅې
۷ مرغومې ۱۴۰۲ه.ش
۱۵ جُمَادَى الثاني ۱۴۴۵ ه.ق
دهلمند ولایت د کرنې، اوبولګولو او مالدارۍ ریاست لخوا په دې وروستیو کې د بېلا بېلو برنامو ترڅنګ د تخمونو د کیفیت او کمیت پر اصلاح کار پیل شوی دی، چې سږکال یې هم نږدې ٤٢زره بزګرو ته د غنمو باکیفیته اصلاح شوي تخمونه او کیمیاوي سرې ویشلي دي.
د یادو هڅو په دوام، د سوېل لویدیځ زون د اصلاح شویو تخمونو د تصدیق ورکولو آمریت لخوا، د راتلونکي کال لپاره دزون په کچه دوو څېړنیزو فارمونو، د خصوصي سکټور د اصلاح شویو تخمونو تصدیو او لسو خصوصی شرکتونو ته زمینه برابره شوې ده، ترڅو خپلو اړونده قراردادي بزګرانو ته د غنمو بېلابېل صنفونه«هستوي، مورني او بنیادي» چې ټولیزه کچه یې ۲۰۸۴۳۸ کیلوګرامه کېږي اصولآ د کرنې په موخه په واک کې ورکړي دي چې یاد تخمونه په ۸۳۴۱ جریبه ځمکه باندې کرل شوي دي.
د هلمند ولایت د کرنې ریاست د اټکلیزو معلوماتو پر بنسټ به له یادې ځمکې څخه ۸۳۰۰ متریک ټنه مورني، بنیادي او تصدیقي تخمونه په لاس راشي، چې دغه تخمونه به د لا زیات ترویج او تکثیر په موخه د راتلونکي کال لپاره د زرګونو بزګرو په واک کې ورکړل شي.
