کندهار کې پر ۱۰۰۰ مالدارانو د څارویو د خوراکي توکي ووېشل شوې
۵ مرغومې ۱۴۰۲ه.ش
۱۳ جُمَادَى الثاني ۱۴۴۵ ه.ق
د کندهار دکرنې، اوبولګولو او مالدارۍ ریاست د «اف،جي،اې» مؤسسې په همکارۍ ددې ولایت د لوړ شاولیکوټ ولسوالی پر ۱۰۰۰ مالدارانو د څارویو خوراکي توکي او درمل وېشلي دي.
ددې مرستې په وېش غونډه کې د کندهار دکرنې، اوبولګولو او مالدارۍ رییس الحاج مولوی فضل الباري فضلي، د لوړ شاولیکوټ ولسوال حاجي عطاء محمد خالد، د حیواني روغتیا او مالدارۍ آمر حاجي محمد حامد او یوشمېر نورو سیمه ییزو چارواکو حضور درلود.
د کندهار دکرنې، اوبولګولو او مالدارۍ رییس الحاج مولوی فضل الباري فضلي له مرستندویو مؤسسو څخه مننه وکړه، چې ددې ولایت له بزګرانو او مالدارانو سره مرستې او همکارۍ کوي هغه پر ټولو کورنیو او بهرنیو مرستندویو مؤسسو غږ وکړ، چې اسلامي امارت دوی ته هر ډول اسانتیاوې برابري، ترڅو دوی اړ اړمنو بزګرانو او مالدارانو سره مرستې وکړي.
په همدې حال کې د «اف.جي.اې» مؤسسې ولایتي مسوول د کندهار دکرنې ریاست له چاراکو مننه وکړه، چې له دوی سره په هره برخه کې همکاري کوي.
د چارواکو په خبره ددې پروګرام په ترڅ کې هر مالدار ته د څارویو ۲۰۰ کیلوګرامه خوراکي توکي، د شفتلو درې کیلوګرامه تخم او درمل ورکول کېږي.
ددې مرستې موخه د بېوزله مالدارانو لاسنیوی او په ټوله کې په دې ولایت کې د مالدارۍ سکټور ودې او پراختیا زمینه برابرول دي.
