د لغمان قرغیو کې د پنځو کرنیزو پروژو چارې روانې دي
۵ مرغومې ۱۴۰۲ه.ش
۱۳ جُمَادَى الثاني ۱۴۴۵ ه.ق
د لغمان دکرنې، اوبولګولو او مالدارۍ ریاست چاراکي وایي، چې بزګرانو ته د اسانتیاوو برابرولو په پار ددې ولایت د قرغیو په ولسوالی کې د پنځو کرنیزو پروژو چارې پیل شوي دي، چې رغنیزې چارې یې په چټکۍ روانې دي.
د لغمان دکرنې ریاست چاراکي وايي، چې دغه پروژې د لغمان ولایت د قرغیو ولسوالی په پنځو کلیو کې د اکشن اېډ مؤسسې په همکارۍ پلي کېږي، چې په کې واړه بندونه، ګودر او استنادي دېوال جوړول شامل دي، چې په ترڅ کې یې د هرې کلي ۱۰۰ تنه اوسیدونکي په کار بوخت شوي دي.
ددغو پروژو د پلي کېدو موخه ددې ولایت دکرنې او مالدارۍ سکټور د دې او پراختیا ترڅنګ خلکو ته د کار زمینه برابرول او په ټوله کې د خوړو خوندیتوب رامنځته کول دي.
