لوګر کې د کبانو د تولید او روزنې فارم جوړېږي
٢۷ لیندۍ ۱۴۰۲ه.ش
۵ جُمَادَى الثاني ۱۴۴۵ ه.ق
د کرنې، اوبولګولو او مالدارۍ ریاست لخوا د لوګر په ولایت کې د نږدې درې میلیونه افغانیو په ارزښت د کبانو د تولید او روزنې دولتي فارم د جوړولو چارې پیل شوي دي، چې رغنیزې چارې یې په چټکۍ روانې دي او ډېر ژر به ګټې اخیستنې ته وسپارل شي.
د لوګر د کرنې، اوبو لګولو او مالدارۍ رییس مولوی سیدامین هاشمي په داسې حال کې چې د لوګر دکرنې ریاست دمالدارۍ څانګې آمر ډاکټر خانشرین خسروي او مل ټیم یې هم ملتیا کوله د لوګر مرکز پُل علم د کنجک سیمه کې د کبانو د تولید او روزنې دولتي فارم حضونو دجوړولو چارو څخه د څارنې په ترڅ کې اړوندو چارواکو ته د کار لا چټکتیا او کیفیت اړوند لازمې لارښوونې او سپارښتنې وکړې.
د لوګر ولایت د کرنې او مالدارۍ رییس مولوي سید امین هاشمي وویل:«د کبانو د تولید او روزنې دغه دولتي فارم د دوه جرېبه ځمکې پر سر د دوو نیمو میاشتو په موده کې د درې میلیونه افغانیو په ارزښت د کرنې وزارت له پراختیایي بودجې څخه جوړېږي.»
د ښاغلي هاشمي په خبره دغه فارم دوه حوضونه لري، چې په یوه وخت کې د ٦ زرو کبانو د ساتلو او روزلو وړتیا لري او د یوه کال په موده کې به څلور ټنه غوښه بازار ته وړاندې او له دې لاره به شپږسوه زره افغانۍ د دولت بودجې ته ګټه ورسوي.
د یادونې وړ ده، چې اوسمهال لوګر کې د کبانو د روزنې او تولید په موخه شاوخوا لس شخصي فارمونه هم فعالیت لري.
