اروزګان کې د کانګو تبې د مخنیوي په موخه کمپاین ترسره کېږي
٢۶ لیندۍ ۱۴۰۲ه.ش
۴ جُمَادَى الثاني ۱۴۴۵ ه.ق
د اروزګان ولایت دکرنې، اوبولګولو او مالدارۍ ریاست وايي، چې ددې ولایت د کوچیانو او مالدارانو د څارویو خوندیتوب په پار د کانګوتبې پر وړاندې د مبارې کمپاین ترسره کولو په پار اړینې توکي د څارویو پر کلینیکونو وېشلي دي، چې ورسره د ناروغو څارویو درملنه او د کانګو تبې د مخنیوي په پار کمپاین ترسره شي.
د اروزګان د کرنې ریاست چارواکي وایي، چې د دې کمپاین په لړ کې به د کوچیانو څاروي، د څارویو د اوسیدلو ځایونه (غوجلې) او د څارویو منډهي دواپاشي کېږي او ترڅنګ یې مالدارانو ته د حفظ الصحې په هکله معلومات هم ورکول کېږي ترڅو دیادې ناروغۍ دمخنیوي په موخه ورڅخه ګټه پورته کړي.
د کانګو تبه یو وېروسي ناروغي ده، چې د حشرو، کنو او خځندو او یا هم د څارویو لخوا انسانانو ته لېږدي. د غه تبه په څارویو او انسانانو کې یوه ګډه ناروغي ده، چې ډېری وخت له څارویو څخه انسانانو ته لېږدول کېږي او کله نا کله د انسانانو د مړینې لامل هم کېږي.
