کونړ کې ۱۲۵۰۰ څارویو ته د واکسینونو پلي کولو چارې پیل شوې
۲۲ لیندۍ ۱۴۰۲ه.ش
۳۰جُمَادَى الأول ۱۴۴۵ ه.ق
د کونړ د کرنې، اوبولګولو او مالدارۍ ریاست په هڅو د افغانستان لپاره د هالینډ کمیټې له لورې ددې ولایت په شپږو ولسوالیو «خاص کونړ، څوکۍ، پیچ دره، شیګل، چپه دره او شلتن» کې وړو شخوند وهونکو څارویو ته د لیونتوب او انترکس واکسینونونو د تطبیق لړۍ پیل شوې ده.
د کونړ د کرنې، اوبولګولو او مالدارۍ رییس مولوي شیرآقا پیر حبیب الرحمن وویل، چې د هالینډ کمیټې له لورې ۱۲ زره او ۵۰۰ ډوزه واکسینونه وړو شخوند وهوونکو څارویو ته پلي کېږي.
د کونړ دکرنې رییس وویل، چې دغه کمپاین د سیمه ییزو وټرنرانو له خوا د ۷ ورځو په موده کې پلي کېږي، چې موخه یې په وړو څارویو کې د ناروغیو مخنیوی او د څارویو لرونکو اقتصادي ستونزې هوارول دي.
وړاندې تردې هم د هالینډ کمیټې له لورې د کونړ په بېلابېلو ولسوالیو کې زرګونه څارویو ته د لېونتوب واکسینونه تطبیق کړي؛ او په راتلوونکي کې به هم یاد واکسینونه تطبیق شي.
