د کونړ سرکاڼو کې د اوبولګولو پروژې چارې پیل شوې

د کونړ دکرنې، اوبولګولو او مالدارۍ ریاست وایي، چې د ملګرو ملتونو د خوړو او کرنې ادارې په مالي او د افغانستان دکلیو د بیارغونې ادارې په تخنیکي همکارۍ ددې ولایت د سرکاڼو ولسوالی په سونګړۍ سیمه کې د سربندونو، اوبوزېرمو، تراسونو او ۳۰ متره استنادي دېوال رغنیزې چارې پیل شوي دي.
د کونړ دکرنې، اوبولګولو او مالدارۍ رییس مولوی شېرآقا«پیرحبیب الرحمن» وویل، چې ددې پروژې په ترڅ کې د سرکاڼو ولسوالی اوسېدونکو ته د لنډمهال لپاره د کار زمینه هم برابره شوې، چې په ترڅ کې به یې ددغو ولسوالیو یوشمېر سربنونه، د اوبوزېرمې، تراسونه او استنادي دېوال په پاخه او اساسي ډول ورغول شي.
د کونړ دکرنې رییس وول: «کونړ د نورو ولایتونو په پرتله سخت ځپل شوی دی، د ولسونو ضرورتونه او اړتیاوې هم زیاتې دي، نو اړینه ده چې ددې ولایت د کرنیز اقتصاد پیاوړتیا په برخه کې موثرې اقتصادي پروژې پلي شي.»
ددې پروژې د پلي کولو موخه خلکو ته د کار زمینه برابرول، د اوبو د ضایعاتو مخنیوي او په ټوله کې د اوبو مدیریت دی.