کونړ کې پر یوشمېر مېرمنو د کورنیو باغچو او مرخېړیو تولید توکي ووېشل شول
۲۹ لړم ۱۴۰۲ه.ش
۷ جُمَادَى الأول ۱۴۴۵ ه.ق
دکونړ د کرنې، ابولګولو او مالدارۍ ریاست د «شپول» مؤسسې په همکارۍ ددې ولایت په مرکز او وټه پور ولسوالی کې پر ۱۲۰ مېرمنو د کورنیو باغچو جوړولو او د مرخېړیو د تولید اړونده توکي وېشلي دي.
د کونړ دکرنې رییس مولوی شېراقا (پیرحبیب الرحمن) وویل، چې د مرخېړیو او کورنیو باغچو اړونده دا توکي د غیر موسمي سبو د تولید، مېرمنو ته د کارموندنې، د مېرمنو ونډه د دوی د کورنیو په اقتصادي غوړېدا او د خوراکي تنوع په پار پر دغو مېرمنو وېشل شوي دي.
د کونړ ولایت د کرنې رییس وایي، چې د دغو توکو له وېشلو څخه موخه، د غیرموسمي سبو کښت او تولید دي چې، په عملي کېدو سره یې مېرمنو او بېوزله بزګرانو ته د کار زمینه برابره او د دوی د کورنیو د اقتصادي ودې لامل کېږي.
سربېره پر دې، چې دغه کورني باغچې او د مرخېړیو د تولید توکي د بې وزلو او بې سرپرستو کورنیو لپاره د عاید ښه سرچینې دي، په کورنیو کې د خوراکي تنوع ښه عامل هم کڼل کېږي.
