د ننګرهار چپرهار کې یوشمېر بزګران وروزل شول
٢۸ وږي ۱۴۰۲ه.ش
۴ ربیعالاول ۱۴۴۵ه.ق
د ننګرهار دکرنې، اوبولګولو او مالدارۍ ریاست د سولې رېښې او یوشمېر نورو بنسټونو په همکارۍ د چپرهار ولسوالی په ډاګو، ګلدري، سلیمانخېلو او مانو کلیو کې ۱۴۰ تنو بزګرانو ته د الوګانو روزلو په برخه کې روزنیز پروګرام په لاره اچول شوې وه.
د چپرهار ولسوالی د سبو مسؤل حاجي بهادر خان کاکړ په خبره یادې مؤسسي بزګرانو ته د الوګانو د غوره ډولونو ټاکلو، کښت، اوبولګولو، هرزه وښو کنټرول، سرو استعمال، ناروغیو مخنیوي او ګڼو نورو برخو کې روزنه ورکړه.
د ننګرهار د کرنې، اوبولګولو او مالدارۍ ریاست هڅه کوي د ننګرهار په ۲۲ ولسوالېو کې بزګرانو ته د سبو ترڅنګ په غله جاتو، بڼوالۍ، تېلي او صنعتي نباتاتو په برخه کې روزنه ورکړي؛ ترڅو عصري کرنه دود او په نتیجه کې د خوړو خوندیتوب رامنځته شي.
