میدان وردګو ولایت کې پر۸۰۰۰ بزګرانو د غنمو او سبو اصلاح شوي تخمونه وېشل کېږي
۲۶ زمری ۱۴۰۲ه.ش
۱ صَفَرُ المُظَفَّر ۱۴۴۵ه.ق
د میدان وردګو ولایت دکرنې، اوبولګولو او مالدارۍ ریاست د ملګرو ملتونو دخوړو او کرنې ادارې (اف.ای.او) په مالي او د مسلکي روزني او بیارغونې مؤسسې په تخنیکي همکارۍ د « خوړو خوندیتوب بېړنۍ پروژې» له لارې ۸۰۰۰ بزګرانو او کروندګرو سره د غنمو او سبو اصلاح شویو تخمونو او کیمیاوي سرو مرسته کوي.
دغه پروژې د میدان وردګو ولایت په مرکز میدان ښار او دغه راز د سیدآباد، جغتو، چک، نرخ او جلریز ولسوالیو کې پلي کېږي.
ددغو پروژو په ترڅ کې پر هر یوه بزګر ۵۰ کیلو ګرامه د غنمو اصلاح شوی تخمونه، ۵۰ کیلو ګرامه یوریا او ۵۰ کیلوګرامه ډی.ای.پي سرې وېشل کېږي.
دغه راز په پام کې ده، چې د یادې ادارې له خوا د میدان وردګو ولایت په مرکز ،بهسود، حصه اول بهسود، جلریز، دایمیرداد او جغتو ولسوالیو کې پر ۵۰۰۰ بزګرانو د بېلابېلو سبو اصلاح شوي تخمونه هم ووېشل شي،
ددغو مرستو موخه د بېوزله کورنیو ملاتړ او په دې ولایت کې د کرنې سکټور پراختیا ته زمینه برابرول دي.
باید وویل شي، چې تېرکال هم د یادې ادارې له خوا پر ۸۰۰۰ بزګرانو د غنمو اصلاح شوي تخمونه او کیمیاوي سرې وېشل شوې وې.
