کندهار کې لسګونه بزګران د زعفران ګل راټولولو په برخه کې ورزول شول
د کندهار دکرنې، اوبو لګولو او مالدارۍ ریاست تر رهبرۍ لاندې، د کرنیزو چارو آمریت د مسلکي انجنیرانو له لوري، د کندهار په پنځو ولسوالیو کې ۷۰ تنه بزګرانو ته د زعفران څخه د ګل راټولولو روزنه ورکړل شوه.
د کندهار دکرنې ریاست چارواکي وایي؛ چې په روزل شویو کسانو کې د نېش، میانېشن، معروف، خاکریز او دامان ولسوالیو بزګران شامل دي، چې د هرې ولسوالۍ ۱۴ تنه بزګرانو ته د زعفران پیاز څخه د زعفران ګل راټولولو، وچولو او ورته برخه کې روزنه ورکړل شوه.
د یادونې وړ ده، چې روزل شویو ۷۰ تنه بزګرانو ته، ۶ اوونې وړاندې، د کرنې وزارت په مالي ملاتړ او د کندهار د کرنې ریاست په تخنیکي همکارۍ، د څه باندې ۷ میلیونه افغانیو په ارزښت د زعفران پیاز وېشل شوې وه، چې اوس مهال د یاد زعفران د ګل راټولولو مرحلي ته رسیدلي دي او بزګران تري زیات خوښ دي.
