کندهار کې سلګونه طوطیان قرنطین شو
۲۴ وږی ۱۴۰۳ه.ش
۱۱ رَبِیعُ الْأَوَّل ۱۴۴۶ه.ق
د کندهار دکرنې، اوبولګولو او مالدارۍ ریاست چارواکي وایي، چې ددې ریاست د مالدارۍ امریت له لورې ۶۶۷ طوطیان قرنطین شوي دي.
د چاراکو په خبره ددې کار موخه د څارویو او الوتونکو د بېلابېلو ناروغیو مخنیوی دی، ترڅو د واردت شوي طوطیانو څخه نور الوتونکي او یا څاروي اغېزمن نشي.
یاد طوطیان د پاکستان لاهور ښار څخه د سپین بولدک فرضې کرښې له لارې په ټرانزیټې ډول کندهار ته انتقال شوي، چې د یادو طوطیانو مسؤلینو غوښتل د افغانستان له لارې کویټ هېواد ته یې ولېږدوي.
همداراز یادو طوطیانو مسؤلینو ته به د درېیو ورځو په لړ کې د څارویو د معایناتو ته په کتو سره روغتیا یي سټفکېټ هم ورکول کېږي.
په کندهار کې د څارویو سوداګر او شرکتونه هوسۍ، بیزوګاني، اوښ مارغه او دې ته ورته څاروي راوړي چې د قرنطین دورې او معایناتو وروسته ورته د صحۍ سرټیفکیټ جوړېږي، ترڅو نورو هېوادونو ته یې انتقال کړي.
د یادونې وړ ده، چې په دې وروستیو کې د کندهار د کرنې، اوبو لګولو او مالدارۍ ریاست د قاچاقې غوښو،هګیو، څارویو او خوارکي کې د پام وړ پاملرنه کړي او هیچاته ته یې اجازه نه ده ورکړې، چې هېواد ته بې کیفیته یاد توکي وارد کړي.
