کندهار کې د نږدې ۶۰ زره کوچنیو څارویو د چیچک ناروغۍ پر وړاندې وقایوي کمپاین پیل شو

۲ وږی ۱۴۰۵ هـ.ش
۱۰ رَبِیعُ الْأَوَّل ۱۴۴۸ هـ.ق
د کندهار ولایت د کرنې، اوبو لګولو او مالدارۍ ریاست په هڅو، د اروپایي ټولنې په مالي ملاتړ او د هالنډ کمېټې په تخنیکي همکارۍ، د مالدارۍ آمریت تر مستقیمې څارنې لاندې د کندهار په اتو ولسوالیو کې د نږدې ۶۰ زره کوچنیو څارویو لپاره د چیچک ناروغۍ پر وړاندې وقایوي واکسیناسیون کمپاین پیل شو.
د یاد کمپاین د پیل مراسم د کندهار د کرنې، اوبو لګولو او مالدارۍ ریاست د مالدارۍ آمریت د مسؤلینو په حضور کې ترسره شول. ټاکل شوې چې د درېیو اوونیو په موده کې د مسلکي پاراوټرانو له لوري د کندهار ښار، ډنډ، ارغنداب، ژړۍ، میوند، سپین بولدک، ارغستان او خاکریز ولسوالیو کې شاوخوا ۵۹ زره او ۶۰۰ کوچني څاروي د چیچک ناروغۍ پر وړاندې واکسین شي.
د معلوماتو له مخې، د دې وقایوي کمپاین ټولیز ارزښت ۲۳۰ زره افغانۍ اټکل شوی دی.
د کمپاین موخه د کوچنیو څارویو ترمنځ د چیچک ناروغۍ د خپرېدو مخنیوی، د مالدارۍ سکتور د سالمې ودې ملاتړ، د مالدارانو اقتصادي پیاوړتیا او د احتمالي ناروغیو له امله د مالدارانو د مالي زیانونو راکمولو ته زمینه برابرول دي.
د کندهار د کرنې، اوبو لګولو او مالدارۍ ریاست مسؤلین وايي، د څارویو د ناروغیو پر وړاندې وقایوي واکسیناسیون د مالدارۍ د ودې او د مالدارانو د شتمنیو د ساتنې لپاره مهم رول لري او هڅه کېږي چې په اړوندو سیمو کې د حیواني ناروغیو د مخنیوي په برخه کې لازم اقدامات په منظم ډول ترسره شي.
د یادونې وړ ده چې څو اوونۍ وړاندې هم د کندهار ښار او ۱۸ ولسوالیو کې د خوړو او کرنې نړۍوالې ادارې «اف‌اې‌او» په مالي ملاتړ د شاوخوا ۹۸ زره څارویو لپاره د ناروغیو پر وړاندې وقایوي واکسیناسیون کمپاین پیل شوی و، چې د تطبیق چارې یې لا هم روانې دي.