کرنې وزارت کې د کرنیزو تخمونو د ملي بورډ غونډه دایره شوه
۱ سلواغه ۱۴۰۴ه.ش
۲ شَعبان المُعَظّم ۱۴۴۷ه.ق
د کرنیزو تخمونو د ملي بورډ غونډه د کرنې او مالدارۍ مرستیال مولوي صدراعظم عثماني، د کابل پوهنتون د کرنې پوهنځي استادانو، د بورد غړو او د ملګرو ملتونو د خوړو او کرنې ادارې «افاېاو» د استازو په حضور کې، د کرنې، اوبو لګولو او مالدارۍ وزارت د کرنې او مالدارۍ معینیت د غونډو په تالار کې دایره شوه.
په دې غونډه کې د کرنې او مالدارۍ مرستیال مولوي صدراعظم عثماني په خپلو خبرو کې وویل: «د یوه هېواد د کرنې او مالدارۍ بنسټ او اساس څېړنې دي. موږ هڅه کوو چې باکیفیته تخمونه تولید شي، څو د خلکو، هېواد او بزګرانو په ګټه تمام شي. له بلې خوا، د متخصصینو، بزګرانو او بازار ترمنځ نږدې همغږي ضروري ده او د تخمونو بازار باید کنټرول شي. همدارنګه بزګرانو ته باید پوهای ورکړل شي، څو له اصلاح شویو تخمونو څخه استفاده وکړي او ښه او ډېر حاصلات تر لاسه کړي.»
وروسته، د کرنې وزارت د تطبیقي او توافقي څېړنو ریاست متخصصینو په بېلابېلو زونونو کې د خپلو څېړنو پایلې او فعالیتونه ګډونوالو ته وړاندې کړل. همدارنګه د کرنې وزارت رییسانو، سلاکارانو، متخصصینو او د کابل پوهنتون استادانو د راتلونکو فعالیتونو د لا ښه والي لپاره خپل نظرونه او وړاندیزونه شریک کړل، څو راتلونکی پلان جوړونه د همدغو وړاندیزونو په رڼا کې ترسره شي.
یاده غونډه د تخمونو د کیفیت د لوړولو، د کرنیزو څېړنو د پراختیا او د هېواد د څېړنیزو، تطبیقي او پوهنتوني بنسټونو ترمنځ د همکارۍ د پیاوړتیا په موخه جوړه شوې وه.
