کرنې وزارت کې د افغانستان د کرنیزو او مالدارۍ محصولاتو د نندارتون د جوړېدو په موخه د همغږۍ غونډه دایره شوه
۲۸ چنګاښ ۱۴۰۵ هـ.ش
۴ صَفَر المُظَفَّر ۱۴۴۸ هـ.ق
د کرنې، اوبو لګولو او مالدارۍ وزارت د افغانستان د کرنیزو او مالدارۍ محصولاتو د نندارتون د لا ښه ترسره کېدو په موخه، د ملي او نړۍوالو بنسټونو د همکارۍ او همغږۍ د جلبولو پهپار ګډه غونډه جوړه کړه، چې په کې د افغانستان د کرنې او مالدارۍ د تولیداتو خونې مسؤلینو، د همکارو مؤسسو استازو، د یاد وزارت رییسانو او سلاکارانو ګډون کړی و.
په دې غونډه کې د کرنې او مالدارۍ مرستیال مولوي صدراعظم عثماني، د کرنیزو نندارتونونو د جوړېدو پر اهمیت ټینګار وکړ او ویې ویل، چې د بزګرانو او مالدارانو د محصولاتو لپاره د مناسب بازار رامنځته کول، د هېواد د تولیدي وړتیاوو معرفي کول او د تولیدوونکو، پانګهوالو او خصوصي سکټور ترمنځ د اړیکو پیاوړتیا د کرنې وزارت له لومړیتوبونو څخه دي. نوموړي له ملي او نړۍوالو مؤسسو وغوښتل، چې د لازمې همکارۍ او همغږۍ له لارې د دغه نندارتون په بریالي ترسره کېدو کې فعاله ونډه واخلي.
مولوي عثماني زیاته کړه، چې د کرنې وزارت تل هڅه کړې، څو د تولیداتو د زیاتوالي ترڅنګ د کرنیزو محصولاتو د بازارموندنې او پلور زمینه هم برابره کړي، او د تخصصي نندارتونونو جوړول کولای شي د کورنیو تولیداتو په معرفي کولو، د بازار په پراختیا او د بزګرانو او مالدارانو په ملاتړ کې مهم رول ولوبوي.
ورپسې د افغانستان د کرنې او مالدارۍ د تولیداتو خونې د مدیره پلاوي لوی رییس، خانمحمد فروتن، د نندارتون د جوړېدو لپاره د ترسره شویو چمتووالي په اړه معلومات وړاندې کړل، او ګډونوالو هم د دې غونډې د لا ښه ترسره کېدو لپاره خپل نظرونه او وړاندیزونه شریک کړل.
