پکتیکا کې د خارجي پرازیټونو (کنو) ضد کمپاین پیل شو
۲۸ لېندۍ ۱۴۰۳ه.ش
۱۶ جُمَادَى الثاني۱۴۴۶ه.ق
د پکتیکا ولایت د کرنې، اوبولګولو او مالدارۍ ریاست له خوا په یاد ولایت کې د کانګو تبې ناروغۍ د مخنیوي لپاره کمپاین پیل شو. دغه کمپاین د کرنې وزارت د پراختیایي بودیجې له لارې تمویل شوی دی.
په دې کمپاین کې، چې د ۸ تنه وترنر ډاکترانو په مرسته ترسره کېږي، د مرکز شرنې، مټاخان، زرغونشهر او اورګون ولسوالیو کوچي مالدارانو او څارویو ساتونکو ته د څارویو او تبیلو دواپاشي شوې ده. یاد ډاکترانو ته د کنو ضد درمل، دواپاشي پمپونه او د حفظ الصحې اړوند کڅوړې وېشل شوې دي، تر څو د یادې ناروغۍ د مخنیوي لپاره ترې کار واخلي.
کانګو تبه (وینه بهېدونکې تبه) یوه وېروسي او مرګونې زونوزس ناروغي ده، چې د کنو له لارې د یو څاروي څخه بل څاروي او انسانانو ته انتقالېږي.
د کرنې وزارت د دې کمپاین له پلي کولو موخه د کانګو تبې پر وړاندې د انسانانو خوندي کول او د ناروغۍ د خپرېدو مخنیوی دی.
