پکتیا کې پر یوشمېر بزګرانو د پستې، زیرې او نخودو تخمونه ووېشل شول
۱۲ وری ۱۳۹۹
د پکتیا د کرنې، اوبولګولو او مالدارۍ ریاست د کرنې وزارت د بڼوالۍ او مالدارۍ ملي پروژې «NHLP» په همکارۍ ددې ولایت په مرکز او ولسوالیو کې پر ۳۶ مخکښو بزګرانو د پستې، زیرې او نخودو تخمونه وېشلي دي.
د پکتیا د کرنې ریاست چارواکي وایي، چې هر بزګر ته پنځه کیلو د پستې تخم، پنځه کیلو د نخودو، پنځه کیلو د زیرې تخم او د پستې د تخم د کښت په پار ۱۰ کیلو خریطې وېشل شوي دي.
له دغو مرستو څخه برخمن شوي بزګران د کرنې وزارت له مرستو او همکاریو مننه وکړه او د نورو مرستو غوښتونکي شول.
د پکتیا د کرنې ریاست هلې ځلي کوي، چې په دې ولایت کې اصلاح شوي تخمونه ترویج او د بزګرانو او بڼوالو عواید ډېر کړي.
