پکتیا کې لسګونه شنې خونې جوړېږي
٢۴ تله ۱۴۰۳ه.ش
۱۲ رَبِیعُ الْثاني ۱۴۴۶ه.ق
د پکتیا د کرنې، اوبولګولو او مالدارۍ رییس مولوي سید امین هاشمي وایي، د ملګرو ملتونو د خوړو او کرنې ادارې په مالي او د «او،آر،ډي» مؤسسې په تخنیکي همکارۍ په دې ولایت کې د موسمي سبو د کرکیلي دودولو او د بزګرانو د ملاتړ په پار ۱۴۵ شنې خونې جوړېږي.
ښاغلی هاشمی په خپلو خبرو کې وویل، چې دغه شنې خونې ۳۰ په مرکز ګردیز، ۳۰ په شواک، ۲۵ په زرمت، ۳۰ په سیدکرم او ۳۰ په جاني خیلو ولسوالیو کې جوړېږي، چې د دغو شنوخونو جوړولو په پار پر ۱۴۵ بزګرانو د شنوخونو ۴۱ توکي ووېشل شول.
یادی شنې خونې په ټولو موسمونو کې سابه او ترکاریو ته د پکتیا د خلکو د لاس رسي، د موسمي تولیداتو زیاتوالی او په بازارونو کې د کرنیزو حاصلاتو د ډېرښت په پار په دې ولایت کې جوړېږي.
